کاروار 28 / اکتوبر (ایس او نیوز) ضلع ڈپٹی کمشنر گنگو بائی مانکر نے اخباری نمائندوں کو بتایا ضلع شمالی کینرا میں ووٹر لسٹ کو قطعیت دینے کے لئے 18اور 19 نومبر کے علاوہ 2او 3 دسمبر کو خصوصی مہم چلائی جائے گی ۔
ڈپٹی کمشنر نے کہا کہ ضلع کے تمام پولنگ بوتھس، گرام پنچایت، بلدی اداروں، تحصیلدار، اسسٹنٹ کمشنر اور ڈپٹی کمشنر کے دفتروں میں عوام کی معلومات کے لئے ووٹر لسٹ کا مسودہ (ڈرافٹ) مہیا کیا گیا ہے ۔ اس میں شامل نام اور دیگر تفصیلات کے تعلق سے جائزہ لیا جا سکتا ہے ۔ اگر اس میں کوئی ترمیم یا اضافے کی ضرورت ہو یا نئے نام شامل کرنے ہوں تو ضروری کاغذات کے ساتھ بوتھ لیول آفیسر، اسسٹنٹ الیکٹرول رجسٹریشن آفیسر (تحصیلدار) کے دفتر سے 9 دسمبر تک رابطہ قائم کر سکتے ہیں ۔
ڈی سی نے بتایا کہ 18 اور 19 سال کے نئے ووٹرس اور عوام اپنے نام ووٹر لسٹ میں شامل کرنے یا کسی قسم کی ترمیم کرنے کے لئے ووٹرس ہیلپ لائن ایپ یا موبائل ایپ کا بھی استعمال کر سکتے ہیں ۔ اس کے علاوہ بی ایل او کی مدد سے بی ایل او ایپ کے ذریعے بھی یہ کام کیا جا سکتا ہے ۔
ڈپٹی کمشنر نے بتایا کہ خصوصی مہم کے بعد فائنل ووٹر لسٹ 5 جنوری 2024 کو جاری کی جائے گی ۔
ڈی سی کی طرف سے فراہم کردہ اعداد و شمار کے مطابق اس وقت ضلع میں تعلقہ وار ووٹرس کی تعداد درج ذیل ہے :
| جملہ | مخنث | خواتین | مرد | تعلقہ |
| 2,20,436 | 0 | 1,11,799 | 1,08,637 | کاروار |
| 1,88,903 | 3 | 94,612 | 94,288 | کمٹہ |
| 2,23,329 | 0 | 1,10,027 | 1,13,302 | بھٹکل |
| 2,01,141 | 2 | 1,00,214 | 1,00,925 | سرسی |
| 1,83,166 | 1 | 90,659 | 92,506 | یلاپور |
| 1,81,557 | 2 | 90,231 | 91,324 | ہلیال |
| 11,98,532 | 8 | 5,97,542 | 6,00,982 | جملہ |